Tuðað fyrir eftirmælunum

Mér virðist þessi ræða Geirs hafa það markmið helst, að kenna ESB um hrunið á Íslandi. Regluverk EES meingallað og svona. Það gleymist í þeirri frásögn, að fjármálaeftirlitið á Íslandi hefði hæglega getað þvingað Landsbankann til þess að hafa Icesave í dótturfyrirtækjum. Einfalt hefði verið að gera eins og breska fjármálaeftirlitið gerði við breskt dótturfyrirtæki Kaupþings stuttu fyrir hrun: auka bindiskylduna upp í 90% eða láta binda öll innlán á reikningi í seðlabankanum. Ef það hefði verið gert væri ekkert Icesave að fara að ríða Íslandi eins og mara næstu áratugi. 

Eftirmæli Geirs eru og munu alltaf verða, að hann var fjármálaráðherra og forstætisráðherra í þeim ríkisstjórnum sem lögðu grunninn að stærsta hruni, dýpstu kreppu og mesta skuldafeni sem Ísland hefur orðið vitni að. Skólarnir, dagvistunin, heilbrigðisþjónustan, elliheimilin og allir innviðir samfélagsins munu fúna, og líf fjölmargra íslendinga munu verða sífellt stress og peningaáhyggjur, meðal annars vegna þess að Geir Hilmar Haarde stóð sig eins illa í sínu starfi og hugsanlegt var, og brást því trausti sem honum var sýnt á svo yfirþyrmandi hátt. Geir: hættu að tuða yfir ESB, og biðstu afsökunar.

Ein ástæða þess að bankar hafa erlenda starfsemi í útibúum í stað dótturfyrirtækja er að þá eru færri og einfaldari reglur að fylgja, og það er miklu auðveldara að eiga við eitt fjármálaeftirlit en mörg. Kerfið gerir bönkum kleift að "shoppa" eftir auðsveipasta fjármálaeftirlitinu, og láta það hafa með sér eftirlit. Það bendir allt til þess að Landsbankinn hafi ekki þurft að leita neitt sérstaklega lengi, og það var alveg ábyggilega engin tilviljun. 

 

Nýjar ESB-reglur um bankakerfið ganga ekki nógu langt

Athugasemdir

[Gunnar Bjarki (IP-tala skráð) 20.6.2009 kl. 13:21]

Halldor: Haettu ad tuda yfir thvi hver hafi verid i rikisstjorn hvenaer og leyfdu okkur ad fara ad raeda af alvoru hvad se rett ad gera i stodunni nuna. Thad ad hrauna yfir Geir er ordid gomul tugga, ber vott um lelega roksemdafaerslu og dregur i engu ur theim stadreyndum sem hann bendir tharna rettilega a.

[Halldór Bjarki Christensen, 20.6.2009 kl. 14:33]

Gunnar: Fyrirgefðu, ég vissi ekki að ég þyrfti að biðja þig um leyfi. Ég mun tuða yfir Geir þangað til hann lærir að skammast sín.

Þetta snýst ekki um hver hafi verið í ríkisstjórn hvenær. Þetta snýst um að ég og allir mínir nánustu verðum eins velflestir íslendingar í áratugi að súpa seyðið af gerðum þessa manns, sem kann ekki önnur svör en að kenna öðrum um, og heldur áfram, sífellt, að spóla í sama svaðinu.